KMDLNJ dënon vrasjen e policit Arben Sejdiu

Këshilli për Mbrojtjen e të Drejtave e të Lirive të Njeriut (KDMLNJ) dënoi ashpër vrasjen e policit Arben Sejdiu dhe plagosjen e dy personave të tjerë. KMDLNJ pohoi se vrasja e policit dhe plagosja e kushërinjve të tij në shtëpi paraqet një sulm të rëndë për qytetarët e Kosovës, jetën e dhe pasurinë tyre.
KMDLNJ po ashtu vlerëson se vrasja e policëve të Kosovës paraqet sulm në vet shtetin e Kosovës.

Këshilli për Mbrojtjen e të Drejtave dhe Lirive të Njeriut kërkoi nga organet përgjegjëse që të ndërmarrin masat e nevojshme për identifikimin e autorëve të krimit dhe vënien e tyre para drejtësisë.

“Mos zbardhja e këtij rasti dhe rasteve të tjera është një sinjal i keq për sigurinë dhe rendin në Kosovë. Krimet e pandriçuara kundër policëve të Policisë së Kosovës janë inkurajim për krimin e organizuar dhe kriminelët e të gjitha ngjyrave”, thuhet në reagim.

Edhe partitë politike në vend kanë dënuar vrasjen e policit Arben Sejdiu.

Ndryshe, në mbrëmjen e së hënës, pas një sulmi të armatosur , në shtëpinë e Naim Sejdiut në Grabanicë të Klinës, ka mbetur i vrarë oficeri i policisë së Kosovës Arben Sejdiu dhe janë plagosur i zoti i shtëpisë Naim Sjediu dhe djali Qemajl Sejdiu.

KMDLNJ po ashtu kërkoi të hetohet rasti i sulmit ndaj hetuesit të policisë së EULEX-it, por pa e paragjykuar rastin.